هل في حدا بيضمنلك زيادة المبيعات؟ الجواب الصادق: لأ، وهاي نعمة
أكثر سؤال بينسأل لأي مسوّق: «إذا دفعتلك، شو بتضمنلي؟» الجواب الصادق بيزعج، بس بيوفر ميزانيات محروقة. شو اللي فعلاً بيجيب زيادة المبيعات، ولعبة بتفرجيك ليش.
أكثر سؤال بيوصلني، وبأشكال مختلفة، هو نفس السؤال:
«إذا دفعتلك، شو بتضمنلي؟ يعني بكم بترجعلي المبلغ مبيعات؟»
وهاد سؤال منطقي مية بالمية. اللي بيدفع من حقه يعرف شو بياخد مقابل مصاريه. المشكلة مش بالسؤال. المشكلة بالجواب اللي بيسمعه أغلب الناس.
ليش ما حدا بيقدر يضمن؟ لأن الإعلان مش المعادلة كلها
خلينا نحكيها بصراحة: البيع ما بيصير من الإعلان لحاله. الإعلان بيعمل شغلة وحدة بس، بيجيب الشخص الصح لباب محلك. اللي بيصير بعد الباب هو اللي بيقرر:
- المنتج نفسه: بيستاهل السعر ولا لأ؟
- العرض: ليش يشتري منك إنت مش من اللي جنبك؟
- الثقة: مين حكى عنك قبله؟ شو التقييمات؟
- الصفحة أو الحساب: الكبسة وين بتهبط؟ على إشي بيبيع ولا بيلخبط؟
- الرد: الزبون سأل، مين جاوبه وبعد قديش؟
- المنافسين: شو معروض حواليك بنفس اللحظة؟
كل واحد من هدول بيقدر يقتل حملة ممتازة لحاله. وأغلبهم مش بإيد شركة التسويق أصلاً، بإيدك إنت.
وأزيدك من الشعر بيت: حتى الشركة اللي عندها فريق تسويق داخلي كامل ما بتقدر تضمن نتيجة مطلقة لحالها. فكيف حدا شافك أول مرة وبيوعدك؟
جرّبها بإيدك: الإعلان ممتاز، والباقي عليك
بنيت لعبة صغيرة توضح النقطة أحسن من ألف جملة. جوّاها إعلان ممتاز ومقفول: ألف كبسة مضمونة، ما بتقدر تلمسه. كل اللي بتقدر تحركه هو باقي المعادلة.
جرّب تخلي كل شي واطي وشوف كم بيع بيطلع من ألف كبسة. بعدين ارفع عامل عامل. وخد بالك من شغلة: المعادلة ضرب مش جمع، يعني عامل واحد ميت بيقتل النتيجة كلها حتى لو الباقي عشرة عالعشرة.
لعبة قصيرة
معادلة البيع
الإعلان عنا ممتاز ومقفول: ألف كبسة مضمونة. حرّك باقي العوامل وشوف مين اللي بيقرر كم بيع بيطلع من نفس الألف.
شو بيصير بالألف كبسة؟
0 بيع
الأرقام توضيحية لتشوف شكل العلاقة (ضرب مش جمع)، مش توقع لمشروعك. توقع مشروعك بيطلع من تشخيصه.
طيب شو اللي بينضمن فعلاً؟
هون الفرق بين اللي بيبيعك وعد واللي بيشتغل معك صح.
اللي بينضمن هو المنهجية: إنه ميزانيتك ما تنصرف عالتخمين. دراسة قبل ما ننفذ، اختبارات صغيرة قبل الميزانية الكبيرة، أرقام بتنقرا كل أسبوع، وقرارات بتتغير حسب اللي بتقوله الأرقام. وقف اللي بيخسر، زيد اللي بيربح.
هاد بينضمن لأنه بإيد اللي بيشتغل. أما «بجيبلك مية زبون بالشهر» فوعد على إشي نصه مش بإيده، وعالأغلب ما بيعرف سوقك بعد.
طيب شو اللي فعلاً بيزيد المبيعات؟
مش إعلان أقوى ولا ميزانية أكبر. زيادة المبيعات بتيجي من المعادلة كاملة وهي شغالة مع بعضها: عرض واضح بيميّزك عن اللي جنبك، صفحة أو حساب بيبيع مش بس بيبيّن، رد سريع عالاستفسارات، وقياس بيقلك شو تكرّر وشو توقف.
لما هدول يترتبوا، الإعلانات الممولة بتصير آخر قطعة بالمعادلة، مش أولها. وترتيبهم بهالشكل هو حرفياً شغل الاستراتيجية: تشخيص قبل صرف، مش صرف وبعدين تفسير.
خمس أسئلة اسألها لأي حدا بيوعدك بنتيجة
-
«على أساس شو بنيت هالوعد؟»
إذا الجواب ما فيه دراسة لسوقك وعرضك ومنافسيك، فالوعد رقم مرمي بالهوا. نفس الرقم اللي انوعد فيه اللي قبلك.
-
«شو بتقيسوا، وشو بتفرجوني كل أسبوع؟»
اللي بيضمن مبيعات وما بيعرف يشرحلك كيف بيقيسها، عنده مشكلة بالرياضيات أو بالصراحة.
-
«شو بيصير لو الشهر الأول ما جاب النتيجة؟»
الجواب الصادق فيه كلمة «منحلل ومنعدّل». الجواب المريب فيه تمديد عقد وحكي عن الصبر.
-
«شو لازم يكون جاهز عندي أنا؟»
اللي بيفهم بيحكيلك عن صفحتك وردك وعرضك قبل ما يحكي عن إعلاناته. اللي ما بيسأل عنهم، بيخطط يحمّلهم المسؤولية لما النتيجة توقف.
-
«ليش أنا بالذات بينجح معي هالرقم؟»
كل مشروع غير: ميزانية، جمهور، سوق، مرحلة. اللي بيعرض عليك نتائج غيرك كضمانة إلك، بيبيعك قصة حدا ثاني.
أسئلة بتتكرر عن زيادة المبيعات
شو أسرع طريقة لزيادة المبيعات؟
عادةً مش إعلان جديد. أسرع نتيجة بتيجي من إصلاح المحطة اللي عم تسرّب زباينك الحاليين: رد أسرع عالمسجات، سعر معروض بوضوح، أو عرض بيجاوب «ليش منك إنت؟». هدول بيرفعوا المبيعات من نفس الزوار اللي أصلاً عم يوصلوك.
في طرق لزيادة المبيعات بدون ميزانية إعلانات أكبر؟
آه، وأغلبها قبل الإعلان مش بعده: حسّن صفحة الهبوط، رتّب رحلة الطلب، رجّع للزباين القدام بعرض جديد، وجاوب الاعتراضات الشائعة بمحتواك. الميزانية الأكبر بتكبّر النتيجة بس لما تكون المعادلة نفسها شغالة.
هل الإعلانات الممولة بتضمن زيادة المبيعات؟
لأ. الإعلان بيضمن وصول، يعني ناس بتشوفك وبتكبس. اللي بيحوّل الكبسة لمبيعة هو العرض والصفحة والرد والسعر. عشان هيك بنقيس كل مرحلة لحالها، وبنصلّح اللي واقف قبل ما نزيد الصرف.
وأنا؟ بحكيها من أول جلسة
أنا ما بضمنلك مبيعات. ولا أي حدا صادق بيقدر.
اللي بضمنه: تشخيص قبل أي تنفيذ، وأرقام بتوصلك مش بتنخبى عنك، وقرارات بتنبنى على القياس مش عالإحساس. حتى البكجات عندي مكتوب تحتها بالحرف: ما في بكج بيضمن مبيعات.
وإذا لسا محتار بين «شركة بتوعد» و«شركة بتدرس»، اقرأ نوعان من شركات التسويق، رح توفر عليك المقارنة الجاية.
المهم بالآخر مش مين وعدك أكثر. المهم مين فهم مشكلتك أعمق.